Şərqi Yaponiya Dəmiryol Şirkəti (JR East) “Jōetsu Shinkansen” xəttinin bəzi hissələrində “Şinkansen” pilotsuz yüksəksürətli qatarlarının kommersiya istismarına başlayacaq.

Fövqəladə hallar zamanı qatarı müşayiət edən maşinistlə iş 2028-ci ildə başlayacaq. Bu, maşinistsiz işləyən ilk yüksəksürətli qatar olacaq.

Avtomatlaşdırılmış qatarlar Tokionun şimal-qərbində Niiqata prefekturasındakı Naqaoka və Niiqata stansiyaları arasında 55,7 kilometr məsafə qət edəcək. “JR East” 2030-cu illərin ortalarına qədər bütün “Jōetsu Shinkansen” xətti boyunca pilotsuz qatarların istismarına başlamağı planlaşdırır.

Şirkətdən bildirilib ki, avtomatlaşdırılmış sistem insan səhvini azaltmağa, təhlükəsizliyi yüksəltməyə və Yaponiyanın əmək qabiliyyətli əhalinin azalması ilə üzləşdiyi bir vaxtda gələcəkdə qatar maşinisti çatışmazlığının öhdəsindən gəlməyə kömək edəcək.

“JR East”in prezidenti Yoiçi Kise bəyan edib ki, pilotsuz idarə olunan texnologiya şirkətə qatarların hərəkətini daha çevik şəkildə planlaşdırmağa, eyni zamanda əməkdaşlara müxtəlif sahələri öyrətməyə imkan verir.

2029-cu maliyyə ilində şirkət Niiqata stansiyası ilə yaxınlıqdakı platformalar arasında tam avtomatlaşdırılmış yüksəksürətli qatarlarını istismara verəcək.

Yaponiyadakı yüksəksürətli qatar operatorları arasında Tokio və Osaka arasında “Tokaido Shinkansen” xəttinin operatoru olan “JR Central” təxminən 2028-ci ilə qədər pilotsuz yüksəksürətli qatarlarını xəttə buraxmağı hədəfləyir.

“JR East” Tokionu sahilyanı bölgələrlə və şimal-şərq əyalətindəki digər şəhərləri paytaxtla birləşdirən Hokuriku və Tohoku Şinkansen xətlərində də yüksəksürətli qatarların xidmətlərini genişləndirməyi nəzərdən keçirir.