ADY dayanıqlı inkişaf istiqamətində əhəmiyyətli irəliləyişlər əldə edib. Əsas nailiyyətlər arasında karbon emissiyasının azaldılması, dəmiryol infrastrukturunun elektrikləşdirilməsi, elektrik qatarları parkının genişləndirilməsi və alternativ enerji mənbələrinə keçid yer alır. Daha təmiz və səmərəli fəaliyyətləri dəstəkləmək üçün müasir texnologiyalara davamlı şəkildə investisiya yatırılır. Dəmiryol sənayesində dayanıqlı təcrübələrin təşviqi üçün tərəfdaşlarla iş birliyi gücləndirilir. 
 

Azərbaycanın bu il COP29-a ev sahibliyi etməsi dayanıqlı inkişaf yolunda mühüm mərhələdir. Bu tədbirə hazırlıqla əlaqədar ADY fəaliyyətini DİM-ə yönəldib və iqlim dəyişikliyi ilə mübarizədə milli öhdəliyini nümayiş etdirir. Dayanıqlılıq ADY-nin əsas dəyərlərindəndir və bu prinsiplərin gündəlik fəaliyyətə tam inteqrasiyası üçün ciddi səy göstərilir. 
 

Ekoloji məsuliyyətə nümunə kimi Biləcəri və Gəncə lokomotiv depolarında günəş panellərinin quraşdırılmasını göstərmək olar. Sözügedən panellər 79 min kilovat-saat elektrik enerjisi istehsal edir və bununla da 8 min kubmetr təbii qaza qənaət edilir. Yeni dəmiryol xətlərinin inşasında infrastrukturun elektrikləşdirilməsi prioritet götürülür, dəmiryol marşrutları boyunca biomüxtəliflik qorunur və ətraf mühitə təsiri azaltmaq üçün tullantı suları təkrar emal olunur. 
Rəqəmsallaşdırma dayanıqlı inkişaf səylərinin dəstəklənməsində  mühüm   rol  oynayır.   2023-cü  ildən  etibarən ADY şəhərətrafı marşrutlar üçün kağız biletlərin istifadəsini dayandıraraq və hazırda mobil tətbiq və veb-sayt vasitəsilə rəqəmsal xidmətlər təklif edir. Bu addım kağız istifadəsini və karbon emissiyasını əhəmiyyətli dərəcədə azaldıb. Bundan əlavə, “Yük daşımalarının rəqəmsallaşdırılması” və “Orta Dəhlizin rəqəmsallaşdırılması” kimi layihələr əməliyyatları sadələşdirərək səmərəliliyi artırır, eyni zamanda, dayanıqlılıq məqsədlərinə töhfə verir. 
 

İnklüzivlik dayanıqlılıq strategiyasının əsas aspektlərindəndir.Hərəkət və görmə məhdudiyyətli sərnişinlərə bərabər səyahət imkanları təmin edilir. Belə ki, əlçatan dəmiryol stansiyaları taktil plitələr, liftlər, eskalatorlar və Brayl əlifbası ilə təchiz olunur. 
 

Davamlı dəyişikliklər yalnız ictimaiyyətin iştirakı və aydın ünsiyyət vasitəsilə əldə oluna bilər. ADY hərtərəfli dayanıqlılıq strategiyalarının həyata keçirilməsi öhdəliyinə sadiqdir. Bu strategiyalar daha dayanıqlı gələcəyin qurulması üçün təkcə əməliyyatları təkmilləşdirmir, həm də maraqlı tərəflərlə güclü əlaqələrin qurulmasını təmin edir.