Təhlükəsizlik

Dəmir Yollarının mühafizəsinin fasiləsiz təşkili

Dəmiryol xidmətlərindən istifadə edən və dəmir yolu ərazisində olan şəxşlərin təhlükəsizliyinin təmin edilməsi “Azərbaycan Dəmir Yolları” QSC-nin başlıca vəzifələrindəndir.

ADY-nin inzibati binaları, anbarları, yardımçı sahələri, əmlakı və yolların mühafizəsi Mühafizə Departamenti tərəfindən təşkil olunur.

ADY-də obyektdaxili rejim qaydalarına və buraxılış rejiminə nəzarət olunur.

Təyin olunmuş dislokasiya yerlərində və yollarda yanğın profilaktika (patrul) işləri aparılır və baş verən yanğınların söndürülməsinə yanğın qatarlarından istifadə edilir.

Dəmir yolları vasitəsilə daşınan yüklər (tranzit və daxili) MHD tərəfindən etibarlı mühafizə və müşahidə olunur. Hər bir yük ölkəmizə daxil olduğu andan etibarən bütün yol boyu ADY-nin Mühafizə Departamentinin işçiləri tərəfindən fasiləsiz qorunur. Yüklərin ünvana təhlükəsiz və vaxtında çatdırılması üçün mühafizə xidmətimiz daim təkmilləşdirilir, yeni innovativ həllərlə 24/7 mühafizə təmin edilir.

Risklərin müəyyən olunması və qabaqlayıcı tədbirlər

Dəmir yollarında mühafizə və təhlükəsizlik fiziki mühafizə, texniki müşahidə kameraları vasitəsilə  fasiləsiz həyata keçirilir.

Vətəndaşların təhlükəsizliyi, ictimai asayişin qorunması dəmir yolları xətt polisi ilə birlikdə təmin olunur.

Mühüm əhəmiyyətli obyekt və məntəqələrdə müasir texnoloji nəzarət qurğuları quraşdırılmaqla qabaqlayıcı tədbirlər görülür.

Mülki müdafiə və fövqəladə hallarla mübarizə

ADY-nin stansiyalarının, məntəqələrinin, müəssisələrinin, ərazi və sahələrinin, o cümlədən obyektlərin, yüklərin və hərəkət tərkiblərinin yanğından mühafizəsi və mülki müdafiə ilə bağlı tədbirlər görülür.

ADY-nin tərkibində fəaliyyət göstərən Mülki Müdafiə şöbəsi Cəmiyyətin illik mülki müdafiə tədbirlər planına əsasən təlim-tədris məşğələlərinin keçirilməsinə, Cəmiyyətin tabeliyində olan müəssisələrdə işçilərin etibarlı mühafizəsinin təmin edilməsi məqsədilə mövcud kollektiv mühafizə qurğularının yararlı vəziyyətə gətirilməsini və işçilərin təxliyyəsi üçün müvafiq tədbirlərin görülməsini həyata keçirir.

ADY-nin xüsusi qatarları həm dəmir yollarında, həm onların yaxınlığında yanğınlarla mübarizə aparır. Hazırda su nasos stansiyası və digər müasir avadanlıqla təchiz edilən 10 ədəd yanğından mühafizə qatarı işləyir. Ölkənin müxtəlif regionlarında yerləşən bu qatarların sayının artırılması planlaşdırılır.

Həmçinin qatarların iştirakı ilə baş vermiş qəzaların nəticələrinin aradan qaldırılması və lokallaşdırılması məqsədilə Fövqəladə Hallar Qatarı İdarəsi fəaliyyət göstərir. İdarə 6 ədəd fövqəladə hallar qatarı, 10 dəmiryol kranı və 2 avtokran, 5 ekskavator, müxtəlif tipli traktorlar, özüboşalan yük avtomobilləri və digər texnika ilə təchiz edilib.

Hərəkətin təhlükəsizliyi

ADY dəmir yolu ərazisindən keçən şəxşlər üçün təhlükəsiz şərait təmin etmək məqsədi ilə mütəmadi olaraq tədbirlər həyata keçirir. Bunun üçün yolötürücüləri, keçid körpüləri, tunellər, xəbərdaredici siqnalizasiya sistemi quraşdırılır və təhlükəli ərazilər çəpərlənir. 

O cümlədən Abşeron dairəvi xətti ilə qatarların hərəkətinin təhlükəsizliyini təmin etmək məqsədilə xətt üzərində 12 yeraltı avtomobil tuneli, 25 yeraltı və yerüstü piyada keçidi inşa olunub, dəmir yolu, rabitə və işarəvermə sistemi yenidən qurulub. Eyni zamanda xətt üzrə 110 kilometr yol daş və metal torlarla çəpərlənib.

Dəmiryol nəqliyyatında davranış qaydaları ilə bu keçid vasitəsilə tanış olmaq olar.